أطلع برة

القصة

كنت في زيارة عند ستي ربنا يديلها طولة العمر .. وقاعدين بنحكي ومرة واحدة دار الحوار التالي
ستي : ياچون انت عندك كام سنة دلوقتي ؟
انا : عندي 19 وداخل في ال20 اهوه انشاء الله .
ستي : ولسة بتدرس ؟؟
انا : ايوة يا تيتة انا لسة في سنة تانية كلية .
ستي : لسة في تانية
انا : o.O يا تيتة انا مسقطتش ولا سنة الحمد لله لحد دلوقتي بس انشاء الله اسقط السنة دي
ستي : ليه كده يابني
انا : انا بتفائل الخير يعني وكل اللي يجيبه ربنا كويس

ستي : ربنا يوفقك يا حبيبي
انا : ربنا يباركلك يا تيتة
وبعد ساعة ونفس الشخصيات اللي كانت قاعدة معانا في الحوار اللي فات هم هم قاعدين في الحوار التالي بس اللي اختلف ان تيتة خرجت من الاوضة فترة ورجعت تاني .

ستي : ياچون هو انت في سنة كام دلوقتي ؟
انا : O.o ايه يا تيتة , في سنة تانية كلية
ستي : لسة في تانية .. ليه انت عندك كام سنة ؟
انا : انا عندي 19 وداخل في ال20 يا تيتة , ومسقتطش ولا سنة في الكلية بس انشاء الله هسقط السنة دي !!!
ستي : ليه كده يابني بس
انا : انا بتفائل الخير يعني وكل اللي يجيبه ربنا كويس
طبعا كل اللي قاعدين قعدوا يبصوا لبعضهم و يضحكوا وستي مش فاهمة هم بيضحكوا علي ايه , واصتحب تعجب تيتة الشتيمة الشهيرة " فيه ايه يا ولاد السابوكشي " وتقول الاسطورة ان السابوكشي ده كان وزير !! مش موضوعنا

الموضوع 

اكيد انا مش بحكيلكم الحوار ده علشان اروش علي ستي مثلاً ولا علشان اعرفكم ان السابوكشي ده كان وزير , الموضوع ان مافيش حد بيحس باللي هو فيه مشكلة الانسان تبدأ من اول لما يحس انه مافيش مشكلة .

البخيل مشكلته انه مش عارف انه بخيل و الغبي مشكلته انه مش شايف انه غبي و مريض الزهايمر مشكلتة انه مش فاكر انه مريض الزهايمر .

مش معني كلامي اننا نمشي نسأل الناس عن نفسينا علشان منقعش في مشكلة التلون بالناس يعني كل واحد يقولك حاجة تعملها وتفقد ساعتها انت كان رأيك ايه ولا كنت بتتصرف في المواقف ازاي بس حاول " تطلع برة " وتتفرج علي نفسك وتشوف اللي انت بتعمله ده صح ولا غلط طبعاً ستي مستحيل تستجيب للنصيحة دي علشان مش هتفتكرها اصلاً لكن انت قريتها وافتكرها انها هتفيدك .


وإلي اللقاء :*