الطائفية مسؤلية - الجزء الثالث - شاهد قبل الحذف الفيلم الممنوع من العرض

في البدء كان المنع
سنة 2003 نزل فيلم اسمه Bruce Almighty بطولة " چيم كاري " و " چينيفر أنيستون" و " مورجان فريمان " الفيلم بيحكي عن قصة مراسل تلفزيوني مش واخد فرصته كويس وبيتعرض لمضايقات كتير .. فبيعترض علي تنظيم الله لحياته وبيتهمه انه لو فيه حد مش شايف شغله كويس يبقي هو " الله يعني " ف " الله " بيديله ميعاد وبيسلمه قوة الله الخارقة وبيقوله دير انت المدينة وانا هاخد اجازة ..
الفيلم اتمنع علشان ازاي وازاي واحد يقوم بدور " الله " واعتبر انه بيسئ للأديان السماوية ..

سنة 2006 اتمنع فيلم " The Da Vinci Code " بأعتباره فيلم يسئ للمسيحية وله ميول إلحادية .. وساعتها اتوجب مع الكنيسة علشان كانوا موجبين مع الازهر ضد الرسومات المسيئة الدنماركية .. 

سنة 2004 تم منع " the passion of the christ " في بعض الدول العربية عدا لبنان ومصر وسوريا .. علشان بيعرض قصة مختلفة عن ثقافة الاغلبية في الدول دي .. وخليني اوضح واستحملوني شوية .. في الديانة المسيحية المسيح هو اللي اتصلب يعني لا شبه لهم ولا حاجة .. في الديانة الاسلامية عيسي مأتصلبش وشبه لهم واحد شبهه هو اللي اتصلب قوم بقي علشان الاختلاف بين الديان ده يتمنع عرض فيلم مهم وتحفة زي الفيلم ده ..

امبارح 5/3/2014 وبعد اكتر من 10 سنين من الافلام اللي اتمنعت وذكرتها دي .. الازهر طالع بناشد الدولة والجيش واي حد في اي حته انه يمنع فيلم " Noah " فيلم عن قصة نوح والطوفان ولسه اصلاً مشافهوش علشان يحكموا عليه انه فيلم حلو ولا وحش .. بس السبب الظاهري انه حرام يتعرض صورة نبي او صحابي .. وخلينا نتكلم عن الانبياء علشان دول اللي يخصوا 3 اديان بطوائفهم .. الانبياء زي موسي او ابراهيم او نوح مثلاً يخصوا اليهود .. ويخصوا المسيحيين .. ويخصوا المسلمين يعني مش قاصرين علي المسلمين بس ..

اخر الهري التافه والمنع للأفلام ده اذا كان من ناحية الازهر او الكنيسة او اي حد بيحاول يمنع .. ان الفيلم بينزل علي النت تحت عنوان " شاهد قبل الحذف الفيلم الممنوع من العرض " والناس كلها بتشوفه .. بس بنكسب نظرة العالم لينا كمتخلفين بنمنع اعمال فنية من العرض عندنا بس ..
واذا كان الازهر عمل كده مع فيلم نوح اللي فيه تشابه بين قصته في القرآن الكريم و التوراه .. ايه رد فعل الازهر او الكنيسة في حاجة عمل قصة حياة " ابراهيم " ؟؟ وهل هيفرق رد الفعل لو اتعمل من الخلفية الاسلامية عن لو اتعمل من الخلفية اليهودية والمسيحية ؟؟