جوزاتك يا محروسة

في حديث مع احد اصدقائي بالكلية من احدي القري في محافظة ممن يدعوهم وجه قبلي بعد بني سويف علطول عن الجواز عندهم عامل ازاي .. وطبعاً مش فاكر كالعادة ايه اللي فتح السيرة دي معاه بس ادينا بدأنا كلام
قالي :  الفلاح والدبلوم والعاطل مش اقل من 40 !
قولتله : 40 ايه بالظبط
قالي : 40 جرام !
قولتله : انا اعرف ان الانسان بالكيلو - ثانية هو ايه اللي 40 جرام
قالي : الدهب الشبكة يعني !
قولتله : 40 للفلاح :O !! طيب والمتعلم والشهادات العليا !
قالي : ايوه 40 للعاطل وكمان 40 دي بقت قليله يعني يوصل ل50 كمان والمتعلم يعني لو شهادة بسيطة وشغل قليل بيوصل ل80 او 100 ..ولو زي كليتنا كده ومعروف انها بتجيب شغل كويس يبقي مش اقل من 120 جرام
قولتله : ثانية واحد هو كلية تعليم صناعي بتجيب شغل كويس !!
قالي : اه هو معروف في البلد انها كلية محترمة .
قولتله : محترمة !! ما علينا مش موضوعنا طيب بس انا مش هسألك انت هتجيبهم منين ال120 انا اللي عايز اعرفة الفلاح والدبلوم هيجيب منين فلوس 40 جرام ده الجرام ال21 مش اقل من 350 و350*40 يبقي عايز 14000 اقل حاجة ده غير المصنعية ! 
قالي : بص فيه اللي ابوه بيساعدة وفيه اللي بياخد قرض
قولتله : قرض !! قرض علشان الشبكة اومال يفرش شقته بأيه وهيرد القرض ازاي
قالي : بص بالنسبة للشقة كده كده كل البيوت دورين دور ارضي للأب ودور تاني للأبن علشان يتجوز فيها بيت عيله يعني وكلة بيتقضي انما موضوع القرض ده فهو بيجيب الدهب وبعد كام يوم من الفرح بياخد الدهب منها ويبيعه ويرد فلوس القرض
قولتله : وهي هتوافق !!
قالي : بعد الفرح هو ليه حكم عليها والدهب يبقي بتاعة !
قولتله : وبالتالي اي واحد بقي عايز يتفشخر يعمل كده ويجيب زي ماهو عايز ! وممكن كمان يكون بتوع الشهادات العليا بيعملوا نفس الحوار ده
قالي : فيه منهم بيعمل كده وفيه منهم بيبقي معاه فلوس
قولتله : طيب سؤال بقي افرض انت بتحب بنت وانا من اهل بلدك وبحب نفس البنت وهي بتحبك انت مش انا بس انا جبتلها شبكة اغلي منك !!
قالي : دي بترجع لدماغ البنت واهلها
قولتله : يعني ممكن يغصبوها علي جوازي بس علشان جايب شبكة اغلي !!
قالي : فيه ناس كده
قولتله "لفظ اصوله اسكندرانية " وبعدها : طيب ليه بقي الجواز عندكم غالي كده من ناحية الشبكة
قالي : غالي بس تمنه فيه
قولتله : يعني ايه !!
قالي : يعني البنت مضمونة
ساعتها حاولت افتكر اي حاجة علشان صاحبي ومينفعش اقبحله هديت وقولتله : طيب علي كده شهادات البنات بتبقي في رينچ ايه !!
قالي : مش محدد يعني فيه اللي بتفك الخط وفيه بكاليريوسات وفيه دبلومات مش بتفرق معظمهم مبيشتغلش
قولتله : يعني البنت اخلاقها عليا و مثقفة وكمان بتشتغل ويبقي كده مش تمنه فيه ومش مضمونه !!
سكت شوية وقالي : لا طبعاً كده تبقي تمام
هييييه اقنعته بس رجع وقالي : بس انا هتجوز من بلدي برضك !

وانتهي الحوار بركوبي الموتوسيكل والذهاب إلي بيتي !

رجعت بيتي وفكرت هل فيه حاجة بنفكر فيها بنفس المنطق ده اللي هو هو كده من غير تغير من غير تفكير من غير ما ندي اهتمام للناس كبير اوي كده وتذكرت بعض كلام الحموات علي مر 19 سنه
انا بنتي متدخلش غير علي شقة 3 اوض وصاله
انا شقة بنتي لازم يبقي فيها تكيف في كل اوضة !! حتي اللي مش قاعد فيها حد زي اوضة الاولاد إلا بقي لو بنتك ناويه تيجي ومعاها الاولاد كده يبقي وفرت علينا كتير
انا بنتي لازم شبكتها متقلش عن الشبكة اللي جات لبنت اختي !! طيب ماكنت انا اتجوزت بنت اختك !
انا بنتي ماتتجوزش واحد إلا ومعاه عربية دفع رباعي ! " لا تشتري العريس إلا والعربة معه ان العرسان علي قفا من يشيل "

المنطق في
اني البنت اللي هحبها هجيبلها كل اللي هي عيزاه مش اللي امها عايزاه وبالنشبة للشبكة دي بتبقي اكسسوارات وهدية من العريس لعروسته يعني انا مثلاً اللي هتجوزها ممكن اجيبلها i-mac هدية الفرح يبقي شبكتها بتفاحة ☺

اللي بتعمله في ياتك من غير ما تفكر فيه ده غلط حتي لو كنت اللي بتعمله صح فكر انت بتعمل ايه ليه مش علشان كله بيعمل كده تعمل زيهم متبقاش خروف للعادات والتقاليد
" طولت عليكم بس يارب يكون المقال عجبكم "