الطائفية مسؤلية " الجزء الاول , حصة الدين "

من اولها اهوه .. انا همشي علي خطي الرئيس الطيب الكيوط " عدلي منصور " ومش هتكلم في السياسة

من زمان بس مش بعيد اوي يعني .. جم حبة ناس قالولك احنا هنطالب بإلغاء حصة الدين وتخفيف الايات القرأنية من المناهج , المهم الناس ردوا عليهم وقالولهم انتوا هتكفروا ولا ايه ؟؟ .. ما هي دي العلمانية اللي بينادوا بيها .. وطبعاً كلنا عارفين علمانية يعني ايه والعياذ بالله .
غالباً الناس اللي مش موافقين الغاء حصة الدين دول هم هم العيال اللي لما كنت بتتخانق معاهم وتيجي ترميلهم شنطهم يقولولك " لا حرام عليك دي فيها كتاب دين " حتي لو اليوم ده مافيهوش حصة الدين في المدرسة وحتي لو الشنطة مافيهاش كتاب دين اصلاً " .

هحكيلكوا حدودتة

وانا في اولي ابتدائي حولت من مدرسة خاصة لمدرسة حكومي , وبما اني لسة مكنتش اعرف فين المكان اللي بيتجمعوا فيه علشان ياخدوا حصة الدين " المسيحي " نظراً بقي لأننا اقلية فبنتنقل من الفصل بتاعنا لأي فصل فاضي علشان ناخد فيه حصة الدين .. المهم جه ميعاد حصة الدين وروحت طالع مع واحد زميل مسيحي علشان يدلني علي الفصل .. واحنا طالعين علي السلم قابلنا مدرس ربنا يسامحة بقي
قالنا : سايبين فصلكم ورايحين علي فين
قولتله : رايحين نحضر حصة الدين المسيحي
قالنا : طيب وروني الصلبان اللي علي ايديكم " واحنا في اولي ابتدائي .. واخدلي بالك انت ؟؟ "
المهم زميلي الندل كان داقق صليب راح الاستاذ معديه وهو مصدق يعدي وراح جري علي حصة الدين وسابني انا مع الاستاذ المبجل
قالي : وانت فين الصليب علي ايدك
قولتله : انا لسة مادقيتش صليب يا استاذ صدقني
قالي : انت هتستعبط ؟؟ يلا روح علي فصلك
قولتله : وربنا يا استاذ انا مسيحي اومال هكون طالع معاه ليه يعني " وبدأت كأي طفل اهبل اعيط احساس قهر بقي وكدة "
قالي : خلاص ماتذنش روح علي حصة الدين " وسابني ومشي "
وانا واقف علي السلم لأنا عارف اروح حصة الدين .. وطبعاً خايف اسأل استاذ تاني لا يسألني علي الصليب .. معرفتش اروح فين غير اني ارجع فصلي تاني واحضر حصة الدين الاسلامي " عادي وحدة وطنية " .
عجبتكوا القصة !!

الموضوع

ايه لازمة حصة الدين في المدرسة غير انها اول بذرة طائفية بتتزرع في الطلبة من صغرهم ؟؟
ايه لازمة حصة الدين غير انها بيتقال فيها " ودي الاخلاق اللي بتفرق ال..... عن ال....... مع وضع الديانة اللي تعجبك
ايه لازمة حصة الدين غير انها بتعرفك ان صاحبك اللي قاعد جنبك وبتاكلوا مع بعض ساندوتشات الحلاوة بالقشطة مختلف عنك في الديانة ولازم تبدل الديسك مع صاحب تاني من نفس ديانتك علشان ممكن صاحبك يجيب معاه ساندوتشات لحمة خنازير او ساندوتشات بالويسكي مثلاً
....
من قريب قرأت مقال كان مضمونة ان المسيحين مش مضطهدين علي قد ما هم منعزلين .. ازاي انت عايزني اختلط في مجتمع لو ملاقانيش داقق الصليب يبقي فاكرني بستعبط .. ازاي عايز مسيحي يلعب في المنتخب وهم بيقروا الفاتحة قبل الماتش " انا اه حافظ الفاتحة .. ومش عارف بصراحة هاني رمزي ( اللاعب ) كان بيعمل ايه في المأزق ده بس ازاااي " .. ازاي عايزني اختلط في مجتمع لو مدخلتش سلمت عليه يقولك " ايه يا عم هو انت داخل علي كنيسة " وطبعاً بيتكبس كبسة بنت لازينة لما يعرف انك مسيحي ويقولك انا والله كنت بهزر ههههه .. كونك بتصنفني اقلية اصلاً ده في حد ذاته يخليني انعزل 
.....
هتقولي ماهي الدينا ماشية فل الفل اهيه انت جي تشقلبها ليه بس .. هقولك ماهي فل الفل علشان فيه عالم جوة الكنيسة فيه المسيحي بيقدر يلعب كورة ويرنم ويمثل ويعمل دوري كورة .. عالم مسيحي .. ومتجيش تلومني علي الانعزال
.....
عايز تلغي الطافية ابدأ بالبذرة .