احنا مشروع بهنس

الواقعة الاولي
في يوم نزلت تصوير خارجي في القاهرة .. كانت اول مرة انزل تصوير خارجي في حياتي ولأجل الحظ والنصيب فيه ناس ولاد حلال بلغوا عنا ومكانش معانا تصريح تصوير واتشدينا كلنا علي القسم .. الظابط طلع طيب وسألنا احنا بنعمل ايه ومشانا والدنيا عدت علي خير .. انا طبعاً احبط جداً يعني اول يوم ياربي اصور فيه يتقبض عليا .. المهم بعد ما خرجنا من القسم وخلاص رايحين نركب المترو علشان اروح منه علي المنيب ومن المنيب إلي " بني سويف " وطني .. واقفين نسلم علي اصحابنا القاهراوية .. عدي واحد بشعر طويل ومضفر " افريقي " وعمل حركة ملفتة نوعا ما - انا مش عارف يعني ايه نوعا ما بس حاسس انها كان كده يعني - ومشي كان شكلة مختلف فصورته اتطبعت في نافوخي ...

الواقعة الثانية
مفترشا الأرض ملتحفا السماء ظل الفنان التشكيلي والروائي والشاعر السوداني المعروف محمد حسين بهنس متنقلا بين شوارع وأزقة وسط البلد بالقاهرة حتى انتهى به المآل إلى الموت بردا وجوعا، عندما عُثرعلى جثته على قارعة الطريق متجمدا محتضنا إحدى الأرصفة في أوج موجة البرد القارس التي ضربت القاهرة مؤخرا ...
الخبر ده

ايوة بالظبط هو اللي جه في دماغك دلوقتي ده الراجل الافريقي اللي في الواقعة الاولي هو اللي في الواقعة التانية .. وكأن القدر حطة في طريقي في اليوم اللي كنت محبط فيه ده علشان يوصلي رسالة ما .. يمكن القدر بيحاول يقولي اشتغل اكتر يكمن يقولي متحبطش من اول مره " مش عارف "

الحاجة التانية لقيتها في نفسي دايماً بقول انه لازم نعامل الناس كلها زي بعض واول ما حصل معايا موقف مع واحد منظرة لا يدل علي ما بداخله اتخدعت في المظهر .. يعني مثلاً الراجل اللي نظرتله نظرة عابرة تعني " انا مش هعمل عقلي بعقلك " لو كنت اتكلمت معاه يكمن كنت اتحايلت عليه انه يعلمني شوية او يوصل عقلي لعقله ..

الحاجة التالتة سؤال مش عارف المفروض يتوجه لمين !! .. هو ازاي واحد موهوب وفنان مشهور زي ده محدش يهتم بيه ؟؟ ..

نظرية الحقنة

القصة

كان فيه واحدة قدامي بتقول لبنتها الصغيرة هتسمعي الكلام ولا اجيبلك ام اسماء فقولت في عقلي ايه الجيل الفرافير ده بيخافوا من ام اسماء !! دانا علي ايامي كان فيه ام اربعة واربعين وام رجل مسلوخة مرات ابو رجل مسلوخة وكان فيه عمالقة يعني .. سألتها مين ام اسماء دي قالتلي انها الست اللي بتديها حقنة .. لما قالت الحقنة حسيت بشكة الحقنة بس مكانش فيه حقنة طبعاً وتلاقيك وانت بتقرا دلوقتي حسيت بالشكة برضه .. حسيت ؟؟ يلا بالشفا.

افتكرت واحنا صغيرين قد ايه كنا بنترعب لما نسمع سيرة الحقنة او حتي اللي بيديهالنا - ده لو انت لسه فاكره يعني -
وكان الاب او الام يهدد ابنه بالحقنة .. اللي هي مستحيل الاب هيصرف لأبنه حقنه علشان يعاقبه - إلا لو كان باباك دكتور - وحتي لو صادف وتطلب علاجنا اننا ناخد حقنة ازاي كنا بنترعب كده من شكة حقنة ؟؟ دي حقنة يعني بكتيره هتاخد خمس دقايق وهتنساها .

كبرنا ومبقيناش بنخاف من الحقن بس لسة نظرية الحقنة موجودة وكل ما تكبر حقنتك تكبر معاك وكل ما تفهم اكتر كل ما الحقنة يتغير شكلها .

واللي عايز يبقي واصي عليك لازم يخلقلك الحقنة علشان يتأكد انك بتسمع الكلام ولو حس في يوم انك مباقيتش بتخاف من شكل وحجم الحقنة بيغيرهالك .

عاملين قانون للتظاهر علشان حقنة عاملين محاكمات عسكرية علشان حقنة والناس بتموت علشان حقنة وشباب مستقبلهم بيضيع في معتقلات علشان حقنة والدستور هيعدي علشان حقنة ....

وكل ما هتكبر هتكبر معاك الحقنة وكل ما هتفهم هيتغير شكل الحقنة ..