نُقطة عسل

حبيت اكتب حاجة بنظرة متفائله عن الي بيحصل في البلد وحاجة تخرج الواحد من الاحباط الي هو فيه واليأس غير اني ادور علي حاجة تضحكني وخلاص عايز حاجة اكتبها تعطي امل تعطي تفاؤل فلقيت دي .

 " أكيد فيه لحسة عسل مطرح قرصة النحلة " . 

منة عدلي القيعي

احب ابدأ كلامي من الحدث وليس النتيجة حتي ولو كان الحدث في حد ذاته نتيجة لحدث قبله . 

الحدث هو قرصة النحلة حدث صعب وميتنسيش بسهولة وتفضل طول حياتك فاكر ان فيه نحلة قرصتك وقضيت كام يوم صعب بس من الطبيعي انك لما اخترت تدخل المنحل علشان تجيب عسل انك تتطوقع ان النحلة تقرصك او ممكن تكون النحلة قرصتك في الشارع لو خايف من قرصة النحلة ممكن تقعد في بيتك و تقفل شبابيكك كويس علشان خايف ان يبقي فيه في حياتك قرصة نحلة . مُحبِط 

قرصة النحلة ليها فوائد بتنشط الدورة الدموية ولو انت ما كنتش عايز الافادة كفاية ان القرصة دي هتحميك قدام من ان نحلة تاني تقرصك وممكن تعلم ابنك انه لما يشوف نحلة يهشها علشان متقرصهوش اديك حميت ابنك يا عم ولو وصفت له اد ايه هي مؤلمة هيحذر ابنه منها اديك حميت حفيدك يا عم .

النتيجة

نتيجة احتمال وجود " عسل " مطرح قرصة النحلة مش متوقع اوي لكن اكيد مش هيا الي هتخرب عليك حياتك و اتعامل معاها كحشرة ده لو انت فرضت الضرر بس ولو انت متضايق اوي هفكرك بأن النحلة الي بتقرصك بتموت بعدها فش غليلك يا عم حتي ولو النحل الي انا بتكلم عليه لحد دلوقتي مامتش بس هيجيله يوم ويموت هو والي حميه لحد دلوقتي

المطلوب  

ان مافيش حاجة اسمها اخر الدنيا ولو بتفكر في مستقبل حلو ليك قوم غير الحاضر و تقعدش حاطط ايدك علي خدك وتفتكر ان المصباح هيترمي قدامك ويدوبك تدعكه .

 

  " لو مفهمتش ايه دخل الي فات ده كله بالي بيحصل في البلد متتعبش نفسك في التفكير لأنك انت سبب الي بيحصل " مُحبِط

 

عيل صغير

عيل صغير عمل صوابعه كده هه مسدس وقال لصاحبه تريخ تراخ قام صاحبه طاوعه وساقله فيها وعمله ميت واهله قالوا ده طاخه طاخ !!

من طباع العيل الصغير انه مبيقدرش القيمة يعني لو لعبة غالية وحديثة اتكسرت منه ممكن ميزعلش قد ما لما المسدس الخرز يتكسر منه او لو بنت لو عاروستها ضاعت . 
كمان من طباع العيل الصغير انه مبيدركش كل الامور الي حواليه يعني لو كانوا اهله متجمعين وجات سيرته وسط الكلام وهو مشغول وسط لعبة حتي لو وسطهم مش بياخد باله ان الكلام عليه او ممكن تتكلم قدام العيل بسيم مفقوس انت وواحد صاحبك ولا ياخد باله علشان كده وجود عيال وسط القعدة مبيعملش مشكلة لو فيه اسرار فمن السهل ان الواحد يتكلم ولو حد غمزلة يقولة ده عيل صغير ولا هيفهم .

كمان من صفات العيال انهم ملهومش كلمة يعني عمرك ما في حياتك ما هتاخد وعد من عيل وبعدها تحاسبة عليه لو خلف بالوعد او مثلاً عيل يقولك علي حاجة وتصدقها من غير ما تتأكد ده مش شك في انه كداب لكن العيال بطبعهم خيالهم واسع بس مش مبدع بقدر اتساعة يعني لو شاف كارتون يقلدة لكن ميبتكرش شخصيات من خيالة ده .

ويامه اهلينا يقولولنا - انت هتمشي ورا كلام العيال ؟؟ , او مثلاً الي يمشي ورا العيال مايسلمش من " الاسافين " !! اه مشيها  " الاسافين "


كل دي حاجات اتزرعت فينا من صغرنا و كمان اختبرناها في حياتنا يامه واقتنعنا ان الي يمشي ورا العيال يبقي زيهم
< عايز ترجع عيل اقعد مع شوية عيال فترة كبيرة هيجننوك :) بس مش جنان خطر > 

- المقارنة -

بالمقارنة بأخلاق وطباع وصفات العيال بالي بيحكمونا دلوقتي اتضح ان التشابه كبير قوي بينهم وان الاخوان عيال بيرجعوا في كلامهم مبيهتموش بالكلام الي عليهم  مبيهتموش بقيمة الانسان قدام كرسي الاتحادية او منصب او نباتات مثلاً < ما ذنب النباتات > بس العيب فينا احنا الي موصلناش لمرحلة اننا منخدتش علي كلامهم او منمشيش وراهم بس معذورين اصلهم الي بيحكمونا تخيل لما شله عيال تتصرف في حياتك !! مش بعيد يعملوا فيك اي حاجة ما انا قولتلك خيالهم واسع بس بدون ابداع يعني من الطبيعي انهم يقلدوا اي حاجة < قلد قلد ماهو ده تمامك > 

- نهايته - 
اوعاك في حياتك تمشي ورا كلام العيال بدون ما تتأكد من راجل مش عيل 

لو عايز تشوف اخلاق كلمة الراجل شوف الفيديو ده هيفيدك 

http://www.elgtv.com/ar/channels/A-Man-Was-Born/A-Man-of-His-Word

اخر ساعة في 2010 و اول ساعة في 2011

الحكاية

كانوا بيجهزوا هدوم العيد واشي اكويلي دي يا ماما و بسرعة علشان اصحابي بيرنوا عليا عايز انزلهم وماما تزعق فيا و قالتلي خد اختك معاك الكنيسة وانت نازل قولتلها لا انا هبقي مع اصحابي مش هينفع و دبينا اخر خناقة في حياتي .

قالي بابا استناني بعد القداس علشان نروح مع بعض هجيب مامتك وأختك . قولتلة ماتسبني اخرج مع اصحابي ده يوم رأس السنة برضه . و قابلت كل اصحابي الي عدي عليا منهم والي لقيناه مع بقيت اصحابنا في الكنيسة الي لبس شماس و الي قال هيقضي اليوم . وقفنا نصلي و شوية اطلع برة الكنيسة وشوية وابويا يقولي اقف جنبي هنا بلاش تطلع برة الكنيسة لحسن تاخد لفحة هوا . كل اصحابي كلموني عيدوا عليا . وخلاص اتناولت وخارج من الكنيسة اقف مع اصحابي شوية لحد ما بابا وماما يخلصوا تناول ونمشي خرجت وواقف مع اصحابي وكنا مكركعين من الضحك ايه ده اول مرة نضحك كده و خلاص اهوه بابا خلص تناول وطلع بس مستني ماما و أختي كمان .


حصل الي حصل و بونب العيد فرقع كنيسة و دم ولادها دهن الحيطان والي حصل كان عمله عفريت فوتوشوب الشرطة جابه في يوم . والشرطة قالتلك دور علي الي قتلك يمكن يكون مستخبي هنا ولا هنا ولا اقولك ده مات جنبك لا ده هنا لالالا ده هناك روحوا هاتوه . بس خلاص انا جبتلك الي قتلك بس معصلج لكن ولا تقلق انا راح اعلمة ازاي ينطق و مات سيد بلال وقالك هو القاتل اصلة سلفي . قالك احنا قالتلنا الي قتلكم و طلع سلفي و طلامة سلفي يبقي يستاهل او طلامة سلفي يبقي اكيد هو القاتل وبس يا خويا وكتمنا علي الخبر والدم فضل ملون الحيطان لوحة مرسومة من دم اب علي ابن علي اخت علي عروسة كانت بتتجهز
والوحة كملت بألوان الاطفال اصل الدم ده نادر و بيدي للوحة لمعة و في قلب القاتل فرحة و لصاحبة حرقة قلب ما تنطفي .
الدم عمل لوحة واتعرضت في المعرض والمعرض اخد جوايز يامة اشي حقوق انسان واشي فتنة طائفية واشي دعم لما اتهرت جوايز . بس بعد ما المعرض خلص فيه الي نسي تاريخ اللوحة والي نسي يجيب الي رسمها اصله مش فنان مش رسام بس جمال اللوحة وعظمتها يرجع للألوان هي الي حلوة بس وتستاهل . نسينا نجيب حق الالوان و لحد دلوقتي مش عارفين مين الي رسمها بس الي عارفة اني هيجي عليا اليوم الي ابقي فيه انبونة الوان في لوحة درجات لون الدم .



" كانت لوحة مذبحة كنيسة القدسين . وبقول لكل الألوان اننا فاكرينكم ومش ناسينكم "